कैलालीके पवेरा ओ सिसैयामे सावनके डोला उदघाटन

हिरगर समाचारदाता
धनगढी, १४ सावन ।

कैलाली जिल्लाके कैलारी गाउँपालिका वडा नम्बर ५ पवेरा ओ घोडाघोडी नगरपालिका–११ सिसैयामे सावनके डोलाके उदघाटन हुइल बा ।

आदिवासी जनजाती कठरियाथारु समुदायके पहिल टिहुवार पचैया (गुरीया) के अवसरके दुनु गाउँमे शुकके रोजसे विधिवट रुपमे सावनके डोलाके उदघाटन हुइल हो ।

कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरीके वडका पहुनामे हुइल कार्यक्रममे उहाँ अधिकार ओ पहिचानके बाट बत्वाइबेर रहल संस्कृतिहे जोगैना आवश्यक रहल बटैलै ।

हमार पुर्खानके सिखाइल चालचलन हम्रे विस्रैटी जाइटी उहाँ कहलै, ‘अपन संस्कृति छोरटी, विस्रैटी गैलेसे हमार पहिचान अस्तित्व हेरैटी जाई ।’ सावनके डोला पवेरा गाउँमे एकताके सन्देश डेहल उहाँ बटैलै । यिहीहे संस्कृति ओ मनोरन्जनके रुपमे लेनाफे उहाँ आग्रह करलै । पूर्व जिविस सदस्य तथा गाउँक बुद्धिजिवी समाजसेवी परसराम चौधरी भगवान कृष्ण १६ सय ग्वालिनसंग सावन महिनामे झुलल डोलामे आधारित रहल बटैलै । उहाँ कहलै, ‘सावनके डोला झुल्ना ओ संगे गीतफे गैना करलजाइठ । अब्बेक पिढीहे पहिले यी कार्यक्रम हुइल बाट पत्ता नइहुइल हो,’ उहाँ कहलै, ‘पहिले पुर्खा निरन्तर सावनके डोला डोल्टी आइल रहिट । विचमे निरन्तरता पाई नइसेकल । फेरसे गैल बरसे सुरुवाट कैगिल बा । अबसे निरन्तरता डेना जरुरी बा । पहिले सक्कु जाने मिल्के डोला झुली । विचमे निरन्तता पाई नइसेकल । अपन संस्कृति विस्राइटी औरेक संस्कृति आंगल्टी । संस्कृति बचाइक लाग यूवा पुस्ताहे हस्तान्तरण जरुरी बा ।’ कठरियाथारु समुदायके बुद्धिजिवी समाजसेवी गंगाराम महतों गुरही पर्व मनैनासे पहिले सावनके डोलाके सुरुवाट करके पंचमीके दिन डोला बनाइक लाग प्रयोग करल डोरीके मुरी ओ पुच्छी काटके गुरही संगे अस्रैना करल बटैलै ।

उहाँ कहलै, ‘हमार पुर्खा पहिले निरन्तर डोला डोल्टी आइल रहिट । विचमे बन्द हुइल । पहिले हम्रहिन निरन्तर डोल्टी आइल रही । अब्बेक पिढीहे यकर महत्वबारे खासे पत्ता नइहुुइल । यी चलन निरन्तर चल्टी आइट कलेसे सक्कु जनहनहे पत्ता हुइट । सावनके डोला कठरिया थारु समुदायके चिनारी ओ पहिचानके रुपमे रुपमे रहल ओरसे संरक्षण कैना आवश्यक रहल बटैलै । कार्यक्रममे विशिष्ट पहुना माननीय घनश्याम चौधरीके स्वकीय सचिव शंकर चौधरी, पवेरा गाउँक भल्मन्सा खुशीराम चौधरी, जनकल्याण मावि पवेराके विद्यालय व्यवस्थापन समितिके अध्यक्ष प्रेम बहादुर चौधरी, पवेरा सामुदायिक वन उपभोक्ता समितिके सदस्य कन्या चौधरी, पवेरा गाउँक बुद्धिजीवि अंग्रेजी महतो लगायत मन्तव्य राखल रहिट ।

सावन डोला संचालन कार्यसमिति कैलारी गाउँपालिका वडा नम्बर ५ के संयोजक अमरकेटी चौधरीके घरगोस्यामे हुइल कार्यक्रममे स्वागत मन्तव्य शान्ति चौधरी ओ संचालन सचिव इन्द्रा कठरिया करल रहिट । कार्यक्रममे वडा नम्बर ५ के वडा सदस्य अनारकली चौधरी, मानबहादुर चौधरीलगायत पवेरा गाउँभरिक महिलाहुकनके सहभागिता रहल रहे ।

@Copy Pahura.com