थारु लखागिन संस्थामे पन्ना फेरसे अध्यक्ष

सुर्खेत, २७ सावन ।

वीरेन्द्रनगरमे एक समारोहके विच लखागिन थारु उत्थान मञ्च, सुर्खेतके टिसरा साधारण सभा सम्पन्न हुइल बा ।

संस्थाके टिसरा साधारण सभासे ९ सदस्यीय कार्य समिति चयन करले बा । अध्यक्षमे मानबहादुर चौधरी पन्ना, उपाध्यक्षमे लोक बहादुर चौधरी, सचिवमे अशोक चौधरी, कोषाध्यक्षमे अमर बहादुर चौधरी, सहसचिवमे नरेश चौधरी ओ सदस्यमे सन्ध्या चौधरी, प्रतिमा चौधरी, रविना चौधरी, कलावती चौधरी रहल बटै ।

साधारण सभामे संस्थासे करल टमान कार्यक्रमके आर्थिक वर्ष २०८०÷०८१ असार मसान्तसमके १ लाख ७१ हजार ९७७ अक्षरेपी एक लाख एकहत्तर हजार बराबरके आय व्यय प्रस्तुत करले बा । साधारण सभा कार्यक्रममे अध्यक्ष मानबहादुर चौधरी आर्थिक प्रतिवेदन तथा अइना वर्षमे कैना वार्षिक कार्ययोजना पेस करल रहिट कलेसे प्रगति प्रतिवेदन सचिव जीतबहादुर चौधरी प्रस्तुतत करले रहिट । प्रस्तुत करल आर्थिक प्रतिवेदन तथा प्रगती प्रतिवेदन सर्वसम्मतसे पारित हुइल बा ।

अध्यक्ष पन्ना अइना दिनमे संस्थाहे अभिन सशक्त रुपमे बह्रैना नयाँ रणनीतिके साथ आघे बह्रना बटैटी थारु भाषा, साहित्य, कला, संस्कृति, सभ्यता, मूल्य मान्यताहे संरक्षण कैना युवा पुस्ता, पुराना पुस्ताहे जोरटी तत्कालीन, अल्पकालीन ओ दीर्घकालीन योजनासहित कार्यक्रम कैना ओ थारु समुदायमे सामाजिक, सांस्कृतिक रुपान्तरण कैना योजना बनाके आघे बह्रना प्रतिवद्धता जनैलै ।

कार्यक्रमके प्रमुख अतिथि थारु कल्याणकारिणी सभा केन्द्रीय सदस्य कृष्णबहादुर थारु सुर्खेत उपत्यकाके मुल आदिवासीके रुपमे चिन्ह थारु जातीके लोक संस्कृति लोप हुइटी जैटी रहल अवस्थामे लखागिन थारु उत्थान मञ्चसे सामाजिक, आर्थिक, सांस्कृतिक क्षेत्रमे मियोके रुपमे काम करटी रहल बटैटी थारु समुदायमे राजनीति रुपमेफे आघे बह्रे पर्नामे जोर डेलै । सामाजिक, सांस्कृतिक चेतनामूलक कार्यक्रममे गाउँसे उपस्थिति नइहुइनासे समाजमे परिवर्तन आई नैसेकल बटैलै । कर्णाली प्रदेशसे नेपाल सरकार संस्कृति मन्त्रायलयसे भाषा तथा साहित्य विधामे क्षेत्रीय प्रतिभा पुरस्कार २०८० से पुरस्कृत हुइल सुर्खेतके थारु स्रष्टा लेखक मानबहादर चौधरीसे सुर्खेती थारुके गौरव बह्राइलमे बधाई डेटी अइना दिनमे अभिन सशक्त रुपमे कलम चले कना शुभकामना डेलै ।

कार्यक्रममे थारु कल्याणकारिणी सभाके थारु कल्याणकारिणी सभाके पूर्व केन्दीय पार्षद टेक बहादर चौधरी कहलै, ‘थारु समुदायमे संस्कृतिके अथाह भण्डार हुइल ओरसे पहिचान बचाई पर्ना ओ सक्कु जाने मिल्के आघे बह्रनाके विकल्प नैरहल जिकिर करलै । सुर्खेतमे रहल सक्कु थारु संस्था एक ठाउँमे आइपर्नामे जोर डेलै ।

लखगिन थारु उत्थान मञ्च, सुर्खेतके सल्लाहकार जागुराम थारु कहलै,–‘थारुहुक्रे संस्कृतिके धनी रहरहटीफे अन्य पहाडी समाजके प्रभाव, विश्वव्यापीकरणके कारण अपन संस्कृति खोजे पर्ना अवस्था अइटी रहलप्रति सङ्केत करटी यी संस्थासे थारु समुदायके संस्कृति बचैना कार्य ऐतिहासिक उपलब्धी हुइल बा ।’

कार्यक्रममे लखागिन थारु उत्थान मञ्चके सल्हाकार कालुराम दहित कहलै, –‘थारु समुदायके अगुवाई करके यी संस्थासे मजा उदाहरणीय कार्य करल ओरसे अइना दिनमेफे निरन्तरता डेहे पर्नामे बा । पुराना थारु लोक गीत, मागर, सजना, मैना जैसिन भाकाके गीतहे जोगाई पर्ना आवश्यकता उहाँ औल्यइलै ।

कार्यक्रममे थारु अगुवा समाजसेवी विष्णु चौधरी, मानविर थारु, शेरबहादुर थारु लगायतके वक्ताहुक्रे थारुहुक्रे अपन हकहितके लाग एकजुट हुइटी आघे बह्रे पर्ना बाटमे जोर डेलै ।

@copy pahura